“Pas 30 vitesh, kjo dëshirë në një masë të madhe nisi të realizohet”, ka vlerësuar gazetari nga Prishtina, Mirlind Behluli, duke komentuar hapjen e Panairit të Librit në gjuhën shqipe në Sheshin Skënderbeu në Shkup.
Sipas Behlulit, ky është një hap konkret drejt realizimit të vizionit që intelektualët shqiptarë e kishin artikuluar dekada më parë për rolin e shqiptarëve në kryeqytetin e Maqedonisë së Veriut.
Ai rikujtoi se në qershor të vitit 1996, publicisti dhe veprimtari Xhemail Mustafa, duke shkruar për manifestimin “Ditët e Naimit”, kishte theksuar nevojën që shqiptarët të krijonin kushtet që Shkupi të bëhej qendër politike, administrative, universitare dhe kulturore edhe e shqiptarëve.
Sipas Mustafës, shqiptarët duhej ta demonstronin praninë e tyre kulturore në Shkup, si kryeqytet i vendit dhe hapësirë ku duhej të artikulohej kërkesa për barazi dhe shtetformësi.
Behluli vlerëson se organizimi i Panairit të Librit Shqip në Sheshin Skënderbeu, në Çarshinë e Vjetër të Shkupit, dëshmon se kjo aspiratë historike po merr formë konkrete, veçanërisht tani kur VLEN është pjesë e qeverisë.
