Kryeministri në detyrë, Albin Kurti, ka njoftuar se Qeveria ka kërkuar dizajnimin e “Pakos për Inflacionin 2.0”, e cila parasheh mbështetje financiare prej 100 eurosh për kategori të ndryshme të qytetarëve.
Kurti tha se pakoja synon mbështetje të njëhershme për pensionistët, fëmijët, studentët dhe punëtorët e sektorit jopublik.
“Qeveria jonë dhe e tyre nuk do t’i lërë kurrë vetëm qytetarët pavarësisht bllokadat që të tjerët mund t’i vendosin”, deklaroi Kurti në mbledhjen e Qeverisë.
Sipas tij, pensionistët dhe fëmijët nuk do të kenë nevojë për aplikim dhe pagesat do të realizohen javën e ardhshme.
Ndërsa për studentët dhe punonjësit e sektorit jopublik do të hapet procedurë aplikimi.
Ministri i Financave, Hekuran Murati, tha se mbështetja prej 100 eurosh përfshin të gjithë të punësuarit me paga nën 1 mijë euro që nuk paguhen nga buxheti i shtetit.
Ai përmendi sektorin privat, ndërmarrjet publike, organizatat e shoqërisë civile dhe kategori të tjera jashtë organizatave buxhetore.
Qeveria njoftoi po ashtu edhe rritjen e shtesave për lehonat.
Kurti tha se nga 1 korriku shtesat për lehonat do të rriten nga 325 në 500 euro në muaj.
“Edhe në këtë maj po i rrisim shtesat për lehona, nga 325 në 500 euro në muaj”, deklaroi ai.
