Në një intervistë për emisionin FRONTAL, kandidati i “Aleancës Shqiptare” tha se disa anëtarë të familjes së ish-presidentit Hashim Thaçi i kanë dhënë mbështetje në zgjedhjet lokale të 12 tetorit.
Leutrim Ajeti, kandidati për kryetar të komunës së Graçanicës nga koalicioni “Aleanca Shqiptare”, ka deklaruar se ka marrë mbështetje nga familja e ish-presidentit të Kosovës, Hashim Thaçi.
Në një intervistë për emisionin FRONTAL, Ajeti tha se ka pasur komunikim me disa pjesëtarë të familjes Thaçi, të cilët, sipas tij, i kanë premtuar votën në zgjedhjet lokale që do të mbahen më 12 tetor.
“Familja Thaçi, një pjesë e familjes Thaçi, ma kanë premtuar votën. Kam diskutuar me disa pjesëtarë dhe do të votojnë për Aleancën Shqiptare,” – deklaroi Ajeti gjatë intervistës.
Kandidati i Aleancës Shqiptare po garon për të fituar drejtimin e komunës me shumicë serbe, ndërsa ka theksuar se mbështetja e shqiptarëve në Graçanicë është rritur ndjeshëm falë bashkimit të subjekteve shqiptare në këtë koalicion.
