Kuvendi i Kosovës sot do të mbajë seancë plenare dhe në rend dite ndre të tjera e ka edhe shqyrtimin e vendimit të Qeverisë së Kosovës për dërgimin e Forcës së Sigurisë së Kosovës (FSK)jashtë vendit, si pjesë e Forcës Ndërkombëtare Stabilizuese në Gazë.
Kërkesën për dërgimin e FSK-së në Gazë Qeveria e pati proceduar për miratim në Kuvend më 30 mars.
Ministri i mbrojtjes Ejup Maqedonci pati thënë se kërkesa që FSK-ja t’i bashkohet Forcës Ndërkombëtare Stabilizuese mbështetet në ftesën nga komanda qendrore e Shteteve të Bashkuara, vullnetin politik të shprehur në Bordin e Paqes, si dhe në Ligjin për dërgimin e FSK-së jashtë vendit.
Seanca e Kuvendit pritet të nisë në orën 10:00 e në rend dite gjithashtu është edhe shqyrtimi në parim i projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme.
