Kryeministri në detyrë, Albin Kurti, u ka dërguar ftesa të reja për takim kryetarëve të partive të tjera.
Koha ka raportuar se Kurti u ka dërguar ftesat kryetarit të LDK-së, Lumir Abdixhiku, të PDK-së, Bedri Hamza, e atij të Aleancës Ardian Gjini.
Kurti nuk ka caktuar datë për takim, por e ka lënë të hapur kohën për kur të jenë të gatshëm kryetarët e tjerë të partive.
Deputetja e PDK-së, Blerta Deliu, është përgjigjur shkurt se “është çështje e mbyllur”, kur u pyet nëse Hamza do t’i përgjigjet pozitivisht ftesës së Kurtit.
Kurti u ka dërguar disa herë ftesa kryetarëve të partive për të diskutuar lidhur me formimin e institucioneve, veçanërisht për çështjen e presidentit. Kuvendi ende nuk e ka përfunduar konstituimin pas zgjedhjeve të 7 qershorit. Seanca konstituive nisi më 6 gusht, por deputetët nuk arritën ta përfundonin zgjedhjen e kryetarit dhe të nënkryetarëve.
Vazhdimi i seancës konstituive më 8 gusht nuk prodhoi rezultat, pasi sërish me kërkesën e Kurtit që t’i jepej kohë bisedimeve ndërpartiake, ajo u ndërpre për kohë të pacaktuar.
Gazeta Politika nuk ka mundur ta konfirmojë në mënyrë të pavarur vërtetësinë e këtij informacioni.
