Alexey Meshkov paralajmëron për pasoja të rënda pas thirrjeve të Trump për të rrëzuar avionët rusë që shkelin hapësirën ajrore të vendeve anëtare.
Ambasadori i Rusisë në Francë, Alexey Meshkov, ka paralajmëruar se çdo rrëzim i një avioni rus nga forcat e NATO-s do të konsiderohet si akt lufte. Deklarata e tij u bë gjatë një interviste për kanalin francez RTL, në një kohë kur tensionet mes Moskës dhe aleancës perëndimore janë në rritje.
“Rrëzimi i një avioni rus do të përbënte një akt lufte. E dini që ka shumë avionë të NATO-s që shpesh hyjnë në hapësirën ajrore të Rusisë, me qëllim ose jo, por ata nuk qëllohen nga ne,” tha Meshkov.
Komentet e ambasadorit rus erdhën si reagim ndaj presidentit amerikan Donald Trump, i cili së fundmi deklaroi se vendet e NATO-s duhet të rrëzojnë avionët rusë që shkelin hapësirën e tyre ajrore.
Incidentet në kufijtë lindorë të NATO-s janë shtuar javët e fundit. Polonia raportoi më 10 shtator rrëzimin e tre dronëve rusë në territorin e saj, ndërsa Rumania konfirmoi fluturimin e një droni rus mbi hapësirën e saj ajrore për gati një orë. Po ashtu, më 19 shtator, Estonia njoftoi se tre avionë luftarakë MiG-31 rusë kishin hyrë për 12 minuta në hapësirën ajrore të saj.
Moska i ka mohuar të gjitha akuzat, duke i cilësuar ato si të pabazuara dhe pjesë të një fushate kundër saj. Megjithatë, incidentet e përsëritura po tensionojnë më tej marrëdhëniet mes Perëndimit dhe Rusisë, të cilat prej pushtimit të Ukrainës në vitin 2022 kanë hyrë në fazën më të ndjeshme të dekadave të fundit.
