Kancelari gjerman kërkon përgatitje për ndryshime në lidhjet transatlantike dhe kundërshton lëshimet ndaj Rusisë.
Kancelari gjerman Friedrich Merz, në një fjalim të mbajtur në Kongresin e Unionit Kristano-Social (CSU), paralajmëroi fundin e asaj që njihet si “Pax Americana”, duke theksuar se mbrojtja e garantuar nga Shtetet e Bashkuara për Europën nuk ekziston më në formën e dikurshme. Ai u bëri thirrje vendeve europiane të përgatiten për ndryshime në marrëdhëniet transatlantike dhe të forcojnë mbrojtjen e tyre në mënyrë të pavarur.
“Dekadat e Pax Americana për Europën dhe Gjermaninë në masë të madhe kanë mbaruar për ne. Ajo nuk ekziston më ashtu siç e kemi njohur. Nostalgjia nuk do të na ndihmojë. Ky është një realitet. Amerikanët tani po mbrojnë në mënyrë shumë të ashpër interesat e tyre dhe kjo është arsyeja pse duhet të mbrojmë interesat tona”, u shpreh Merz.
Ai theksoi se prioritetet strategjike të Uashingtonit kanë ndryshuar prej vitesh, duke shtuar se as ish-presidenti Donald Trump dhe as politika amerikane nuk janë zhvillime të papritura. Sipas Merz, “Pax Americana”, rendi i vendosur pas Luftës së Dytë Botërore ku SHBA-të garantonin sigurinë europiane, po i përket së shkuarës.
Merz u shpreh gjithashtu kundër lëshimeve të tepërta ndaj Moskës në përpjekjet për t’i dhënë fund luftës së Rusisë në Ukrainë, duke argumentuar se këto do të forconin ambiciet e Kremlinit. Ai paralajmëroi se presidenti rus Vladimir Putin nuk do të ndalet në Ukrainë dhe synon të rivizatojë kufijtë e Evropës, duke përbërë një kërcënim afatgjatë për sigurinë europiane.
