Artan Behrami, deputet i zgjedhur i PDK-së, ka shkruar një status, ku ka pasur kritika ndaj Dhomave të Specializuara të Kosovës me seli në Hagë.
Sipas Behramit, Gjykata Speciale po synon të kriminalizojë UÇK-në, duke e paraqitur si ndërmarrje kriminale.
Tutje, Behrami ka vlerësuar se Gjykata Speiciale po synon të zbehë përgjegjësinë e krimeve të Serbisë.
Postimi i plotë:
Serbia që dëshiron ringjalljen e Millosheviqit dhe spastrimin etnik të shqiptarëve ishte adresa e furnizimit të dezinformatave në gjykimin ndaj krerëve të UÇK-së.
Gjykata Speciale ka ndërtuar një pjesë të rëndësishme të procesit të saj mbi materiale dhe narrativa që burojnë nga aparati shtetëror i Serbisë.
Në emër të kësaj narrative dhe këtij aparati, ditë më parë foli ministrja e Vuçiqit, Snezhana Paunoviq, e cila kërkoi spastrimin e Kosovës nga shqiptarët.
Paradoksi është i madh.
Nga njëra anë, përfaqësues të shtetit serb vazhdojnë të relativizojnë spastrimin etnik dhe gjenocidin në Kosovë pa u përballur me pasoja politike nga Perëndimi. I mohojnë masakrat, i mohojnë dhunimet, i mohojnë djegiet, shkatërrimet. E mohojnë Reçakun dhe 400 masakra të tjera në Kosovë!
Nga ana tjetër, i njëjti aparat shtetëror trajtohet si burim i besueshëm nga Gjykata Speciale për ndërtimin e një narrative që synon ta paraqesë UÇK-në si ndërmarrje kriminale.
Pra, përveç kriminalizimit të UÇK-së, Gjykata po synon të zbehë përgjegjësinë e Serbisë për krimet e saj dhe t’ia transferojë barrën morale viktimës.
Nuk mund të ketë drejtësi mbi standarde të dyfishta dhe pajtim duke relativizuar krimet e Serbisë.
Dhe nuk mund të ketë besim në një proces gjyqësor që mbështetet në narrativën e një shteti, përfaqësuesit e të cilit edhe sot shprehin keqardhje që spastrimi etnik i shqiptarëve nuk u përfundua!
