Ekonomisti Albian Krasniqi ka kritikuar pakon e fundit të Qeverisë për përballje me inflacionin, duke thënë se ajo do të ndikojë në rritjen e çmimeve në vend.
“Ekziston një ligj i pakontestuar në ekonomi: kur fut para në xhepat e të gjithëve përnjëherë, çmimet nuk ulen por ngrihen”, deklaroi Krasniqi.
Ai krahasoi masat e Kosovës me ato të vendeve të rajonit dhe Bashkimit Evropian gjatë krizës energjetike.
Sipas tij:
- Shqipëria uli akcizën për derivatet me 20%,
- Mali i Zi me 50%,
- Maqedonia e Veriut uli TVSH-në nga 18% në 10%,
- ndërsa shumica e vendeve të BE-së ulën TVSH-në dhe akcizat që në muajin e parë të krizës.
Krasniqi tha se Kosova reagoi e fundit dhe, sipas tij, pa ndihmuar sektorin privat.
“Firmat e Kosovës janë bërë më pak konkurruese, pasi janë të vetmet në Evropë që nuk kanë parë ndonjë lehtësim si pasojë e krizës së energjisë”, u shpreh ai.
Në fund, ai tha se problemi kryesor nuk është fakti që pakoja u prezantua para zgjedhjeve, por mënyra se si është konceptuar.
“Problemi kryesor nuk është se u propozua para zgjedhjeve, por që pako e keqe”, deklaroi Krasniqi.
Postimi i tij i plotë:
PAKO “ANTI-INFLACION” DO TA PRODHOJË INFLACIONIN NGA BRENDA
Ekziston një ligj i pakontestuar në ekonomi: kur fut para në xhepat e të gjithëve përnjëherë, çmimet nuk ulen por ngrihen.
Fillimisht, si u përgjigjën vendet e rajonit ndaj krizës së energjisë qysh në fillim të marsit:
Shqipëria: uljen e akcizës për derivatet me 20%.
Bosnja dhe Hercegovina: uljen e akcizës në nivele të ndryshme, sipas entiteteve.
Mali i Zi: uljen e akcizës për derivatet me 50%.
Maqedonia e Veriut: uljen e TVSH-së nga 18% në 10%, e ndjekur nga një ulje e dytë e akcizës në prill.
Bashkimi Evropian: shumica e shteteve anëtare ulën TVSH-në dhe akcizat për derivatet brenda muajit të parë, pra qysh në mars.
Kosova u përgjigj e fundit. Dhe përgjigjja e injoron komplet sektorin privat. Firmat e Kosovës janë bërë më pak konkurruese, pasi janë të vetmet në Evropë që nuk kanë parë ndonjë lehtësim si pasojë e krizës së energjisë.
Problemi kryesor nuk është se u propozua para zgjedhjeve, por që pako e keqe.
