Kryetari i Lëvizjes Vetëvendosje, Albin Kurti, dhe kryetari i Lidhjes Demokratike të Kosovës, Lumir Abdixhiku, do të takohen sot në përpjekjen e dytë për të arritur një marrëveshje për formimin e institucioneve të reja.
Takimi pritet të mbahet me fillim nga ora 18:00 dhe vjen në një kohë kur LDK-ja mbetet partia e vetme nga ish-opozita që ka lënë të hapur mundësinë e bashkëpunimit me Vetëvendosjen.
Një ditë më parë, Vetëvendosje u ka dërguar ftesa për takim edhe Partisë Demokratike të Kosovës dhe Aleancës për Ardhmërinë e Kosovës, por të dyja partitë e kanë refuzuar.
Në përgjigjen drejtuar Kurtit, kryetari i PDK-së, Bedri Hamza, ka bërë të ditur se partia e tij do të mbetet në opozitë dhe pret që Vetëvendosje të sigurojë shumicën parlamentare për krijimin e institucioneve.
Ndërkaq, kryetari i AAK-së, Ardian Gjini, ka ritheksuar se partia e tij nuk do të jetë pjesë e qeverisë dhe nuk do të marrë pjesë në takim, por ka përsëritur se është e gatshme të kontribuojë nëse në programin qeverisës përfshihen gjashtë kushtet strategjike të paraqitura më herët.
Takimi i sotëm ndërmjet Kurtit dhe Abdixhikut pritet të tregojë nëse ekziston hapësirë për një marrëveshje politike që do t’i hapte rrugë formimit të institucioneve të reja të Kosovës.
