Presidentja e Kosovës, Vjosa Osmani i është kundërpërgjigjur presidentit serb Aleksandar Vuçiq, i cili e akuzoi Turqinë se nuk dëshiron stabilitetet në Ballkanin Perëndimor, pasi të mërkurën në Kosovë arritën mijëra dronë kamikazë, bazuar në një marrëveshje me kompaninë turke “Baykar”
Osmani ka thënë se Vuçiqi po e sulmon pa turp presidentin turk Recep Tayyip Erdogan dhe Turqinë dhe se një gjë të tillë po e bën pikërisht në ditën që presidenti Donald Trump e vlerësoi Ankaranë dhe Erdoganin për lidershipin e tyre të shquar në promovimin e paqes dhe sigurisë globale.
“Jam krenar që kam punuar ngushtë me presidentin Erdogan, një njeri të fjalës së tij, i cili gjithmonë ka treguar kujdes të thellë dhe të sinqertë për të gjithë njerëzit e rajonit tonë dhe ka dhënë një kontribut të jashtëzakonshëm në ruajtjen e stabilitetit, sigurisë dhe mbrojtjes. Ndërkohë, Vuçiq duket se beson se mund të kërcënojë një vend të madh të NATO-s si Turqia në të njëjtën mënyrë siç kërcënon vendet fqinje. Në vend që të bashkëpunojë ngushtë me shtetet anëtare të NATO-s, ai nxit bashkëpunimin mbrojtës me Rusinë, Kinën dhe Iranin”, ka shkruar Osmani.
Osmani në gjuhën turke, ka falënderuar Erdogan dhe popullin e Turqisë që po ndihmon në ruajtjen e paqes duke qëndruar përherë me popullin e Kosovës.
“Le të zgjasë përgjithmonë lidhja jonë e fortë Kosovë-Turqi”, ka përfunduar Osmani.
