
Publicisti Enver Robelli ka thënë se Ibrahim Rugova, për shkak të rolit të tij historik në përpjekjet për lirinë dhe pavarësinë e Kosovës, meriton një vend të përhershëm nderi në institucionet shtetërore.
Në një kolumnë për Telegrafin, Robelli ka shkruar se Kosova nuk ka ndonjë rregull të përcaktuar për vendosjen e fotografive të ish-presidentëve, ndonëse institucionet është dashur ta rregullonin këtë çështje shumë më herët.
“Dr. Rugova është rast i veçantë, sepse nga fundi i viteve 1980 deri kur ndërroi jetë më 2006 i ka prirë një lëvizjeje politike, e cila kishte për synim shpalljen e pavarësisë së Kosovës dhe bërjen e saj Republikë”, ka shkruar Robelli.
Sipas tij, Rugova meriton vend nderi për shkak të rolit historik, respektit që gëzon në popull dhe faktit se ishte politikani më i njohur i Kosovës në botë gjatë shekujve XX dhe XXI.
Robelli ka përmendur edhe praktikën e Shqipërisë, ku në zyrat shtetërore qëndron në mënyrë të përhershme fotografia e Ismail Qemalit.
Sipas tij, kjo është një zgjidhje kreative, pasi fotografia e themeluesit të shtetit nuk ndërrohet sa herë që merr detyrën një president apo presidente e re.
“Në Kosovë kjo mund të zgjidhej duke vendosur fotografinë e Ibrahim Rugovës në institucione”, ka shkruar ai.
Megjithatë, Robelli ka vlerësuar se një zgjidhje e tillë duket jorealiste, pasi secila parti politike ka figurat e veta që synon t’i vendosë në krye të historisë kombëtare.
“Unë e shoh në krye të kësaj galerie Ibrahim Rugovën. Të tjerët mund të kenë mendime të tjera dhe ato po ashtu meritojnë vëmendje”, ka përfunduar Robelli.



