Rreth 300 gazetarë humbin vendet e punës në një “resetim strategjik”; mbyllen sporti, rubrika e librave dhe pezullohet podcast-i kryesor.
The Washington Post ka nisur një nga ristrukturimet më të mëdha në historinë e saj, duke shkurtuar rreth një të tretën e stafit të redaksisë, ose afërsisht 300 punonjës, në kuadër të asaj që drejtuesit e quajnë një “resetim strategjik” për të siguruar të ardhmen financiare dhe editoriale të gazetës.
Në një deklaratë zyrtare, gazeta tha se po ndërmerr “veprime të vështira, por vendimtare” për të forcuar pozicionin e saj në treg dhe për t’u fokusuar në gazetarinë që e dallon nga të tjerët.
Drejtori ekzekutiv Matt Murray u tha punonjësve gjatë një takimi të brendshëm se reduktimi i stafit ishte i domosdoshëm për ta pozicionuar më mirë gazetën për vitet në vijim. “Sot po marrim një sërë veprimesh në të gjithë kompaninë për të siguruar të ardhmen tonë,” deklaroi ai.
Si pjesë e ndryshimeve, gazeta do të mbyllë ekipin tradicional të sportit, ndërsa disa gazetarë do të transferohen në një seksion të ri që do ta trajtojë sportin nga këndvështrimi kulturor. Po ashtu do të zvogëlohen zyrat ndërkombëtare, do të reduktohet mbulimi i lajmeve lokale (metro), do të pezullohet podcast-i kryesor Post Reports dhe rubrika e librave do të shpërbëhet pothuajse tërësisht.
“Ne nuk mund të jemi gjithçka për të gjithë. Por duhet të jemi të pazëvendësueshëm aty ku konkurrojmë,” u shpreh Murray në një mesazh drejtuar stafit.
Punonjësit u njoftuan se do të merrnin email-e individuale për të mësuar nëse preken nga shkurtimet, ndërsa atyre që largohen do t’u ofrohen përfitime financiare deri në mesin e prillit.
Vendimet vijnë në një kohë kur gazeta, pavarësisht rritjes së mëhershme pas blerjes nga Jeff Bezos më shumë se një dekadë më parë, ka pësuar humbje financiare dhe rënie të abonimeve. Gjatë viteve të fundit, qindra punonjës janë larguar përmes pakove të largimit vullnetar.
Shkurtimet masive janë përshkruar nga stafi si një “bloodbath”, ndërsa kritikët paralajmërojnë se reduktimi i thellë i redaksisë mund të dëmtojë cilësinë e raportimit dhe rolin tradicional të The Washington Post si një nga zërat kryesorë të gazetarisë amerikane.
