Presidenti ukrainas thotë se Rusia po teston kapacitetin mbrojtës të Evropës dhe paralajmëron një zgjerim të mundshëm të luftës.
Presidenti i Ukrainës, Volodymyr Zelensky, ka paralajmëruar se presidenti i Rusisë, Vladimir Putin, mund të shtrijë konfliktin e nisur në Ukrainë duke sulmuar një shtet tjetër evropian.
Duke folur në Kiev pas takimit me presidentin amerikan Donald Trump gjatë Asamblesë së Përgjithshme të Kombeve të Bashkuara në New York, Zelensky ka theksuar se Rusia po përgatitet për një luftë edhe më të madhe.
“Putini nuk do të presë ta përfundojë luftën e tij në Ukrainë. Ai do të nisë diçka në drejtim tjetër. Askush s’e di ku. Ai e dëshiron këtë,” ka deklaruar presidenti ukrainas.
Zelensky ka shtuar se Kremlini teston vazhdimisht kapacitetin e Evropës për të mbrojtur hapësirën ajrore, duke përmendur incidentet e fundit kur dronët rusë shkelën hapësirën ajrore të Estonisë dhe Polonisë. Ai gjithashtu ka njoftuar se në Danimarkë janë vënë re dronë të panjohur.
