Deputetja e LDK-së akuzon Kurtin për presion politik dhe mungesë përgjegjësie në zgjidhjen e çështjes së presidentit
Deputetja e Lidhjes Demokratike të Kosovës, Hykmete Bajrami, ka deklaruar se Kosova nuk ndodhet në krizë vetëm për shkak të çështjes së presidentit, por sipas saj, kriza ka kohë që vazhdon për shkak të keqqeverisjes nga kryeministri Albin Kurti.
Ajo e akuzoi Kurtin se nuk synon të qeverisë me përgjegjësi, por të ushtrojë pushtet pa marrë përgjegjësi të plotë, duke e cilësuar atë si një lider që “dëshiron të sundojë, jo të udhëheqë”.
Sipas Bajramit, gjatë takimeve të fundit politike, Kurti ka ofruar katër ministri dhe një pozitë zëvendëskryeministri për LDK-në, me kusht që posti i presidentit të mbetet në duart e Lëvizja Vetëvendosje. Ajo e cilësoi këtë ofertë si presion dhe jo si kompromis.
“Ky nuk është kompromis, por shantazh i paketuar si zgjidhje”, theksoi Bajrami, duke shtuar se qasja e tillë synon kontrollin e situatës dhe jo zgjidhjen e krizës.
Deputetja ngriti shqetësime edhe për gjendjen ekonomike dhe sociale në vend, duke përmendur rritjen e çmimeve, vështirësitë ekonomike dhe largimin e të rinjve. Ajo theksoi se qytetarët në qytete të ndryshme të Kosovës po përballen me kosto më të larta jetese dhe mungesë perspektive.
Në fund, Bajrami paralajmëroi se mund të paraqitet një “zgjidhje e vonshme” në momentet e fundit të afatit kushtetues, duke e cilësuar këtë si pjesë të një modeli politik që, sipas saj, synon krijimin e krizave dhe më pas ofrimin e zgjidhjeve në favor të pushtetit.
Ajo u bëri thirrje qytetarëve që të kërkojnë llogari për situatën aktuale politike dhe ekonomike në vend.
Reagimi i saj i plotë:
Kosova nuk është në krizë vetëm tani për presidentin, Kosova është në krizë që gjatë vjet për shkak të keqqeverisjes së Albin Kurtit.
Albin Kurti nuk dëshiron të jetë Kryeministër, ai dëshiron të jetë UD.Kyeminister, ai dëshiron të sundoj jo të udhëheqë, të jetë i pari i shtetit por jo të marrë përgjegjësi për këtë vend e për qytetarët që jetojnë nga kriza në kirzë.
Sot, ai tentoi një tjetër lojë politike: katër ministri dhe një zëvendëskryeministër për LDK-në, por me një kusht që presidenti të mbetet në duart e tij.
Kjo nuk është ofertë – është është presion.
Kjo nuk është zgjidhje – është një tjetër përpjekje për të imponuar vullnetin e një njeriu mbi vullnetin e qytetarëve.
Ajo që ju ofrua sot LDK-së nuk ishte kompromis – ishte shantazh i paketuar si zgjidhje.
Ta themi qartë: oferta e Albinit nuk ishtë për të dalë nga nga kriza, por për ta kontrolluar atë.
Sot është presidenti; dje ishte nafta; para tyre ishin energjia, çmimet, inflacioni, bizneset që po mbyllen dhe të rinjtë që po largohen çdo ditë. Ndërkohë, qytetarët në Dragash, Pejë, Prishtinë, Podujevë, Gjilan, Kaçanik e gjetiu nuk po jetojnë me ‘opsione politike’, qytetarët po jetojnë me fatura më të shtrenjta, me pasiguri dhe me mungesë shprese se në këtë vend do të bëhet mirë.
Dhe derirsa ata përballen me këtë realitet, qeveria merret me skenarë dhe pazare, me gjetjen e fajtorit, por fajtor tjetër s’ka pos atij që i është dhënë besimi për të gjetur zgjidhje për problemet e qytetarëve.
Mos u befasoni, nëse në minutat e fundit të afatit kushtetues të na paraqitet një tjetër ‘zgjidhje’, e ashtuquajtur ‘konsensuale’, sepse modeli është i njëjtë: krijo krizën, pastaj ofro zgjidhjen që të shërben ty.
Kjo nuk është qeverisje – kjo është mënyrë për të sunduar, por nuk duhet të jetë befasi sepse Albin Kurti, që nga dita e parë, ka funksionuar përmes mashtrimit, gënjeshtrës dhe manipulimit që nga xhipat e zinj e të bardhë, te flamuri lara-lara, te bashkimi kombëtar që nuk ndodhi kurrë, e deri te premtimet për heqjen e TVSH-së për miell, sheqer e vaj.
Qytetarët duhet përfundimisht të kërkojnë llogari për këtë që po ndodhë.
