STOKHOLM, 12 janar (Reuters) – Qeveria e Grenlandës tha të hënën se do të shtojë përpjekjet për të siguruar që mbrojtja e territorit arktik të bëhet nën ombrellën e NATO-s dhe sërish hodhi poshtë ambicien e presidentit amerikan Donald Trump për ta marrë nën kontroll ishullin.
Trump ka thënë se Shtetet e Bashkuara duhet ta zotërojnë Grenlandën, një territor autonom brenda Mbretërisë së Danimarkës, për të parandaluar që Rusia ose Kina ta pushtojnë në të ardhmen këtë territor me rëndësi strategjike dhe të pasur me minerale.
“Të gjitha shtetet anëtare të NATO-s, përfshirë Shtetet e Bashkuara, kanë një interes të përbashkët për mbrojtjen e Grenlandës,” tha qeveria koalicionuese e ishullit në një deklaratë, duke shtuar se në asnjë mënyrë nuk mund të pranojë një marrje nën kontroll nga SHBA, transmeton Reuters.
“Si pjesë e Mbretërisë Daneze, Grenlanda është anëtare e NATO-s dhe për këtë arsye mbrojtja e Grenlandës duhet të bëhet përmes NATO-s,” thuhet në deklaratë.
Komisioneri i Bashkimit Evropian për Mbrojtje dhe Hapësirë, Andrius Kubilius, tha më herët të hënën se çdo marrje ushtarake e Grenlandës nga SHBA do të nënkuptonte fundin e NATO-s.
Trump e hodhi për herë të parë idenë e një marrjeje nën kontroll të Grenlandës nga SHBA në vitin 2019, gjatë mandatit të tij të parë, megjithëse ai përballet me kundërshtime në Uashington, përfshirë edhe brenda partisë së tij.
