Presidenti amerikan thotë se SHBA ka nevojë për Groenlandën për siguri kombëtare, ndërsa Evropa kundërshton.
Presidenti i Shteteve të Bashkuara, Donald Trump, ka sugjeruar të premten se mund të vendosë tarifa doganore ndaj vendeve që nuk e mbështesin kontrollin amerikan mbi Groenlandën. Këto deklarata vijnë në një kohë kur një delegacion dypartiak i Kongresit amerikan ndodhet në Kopenhagë për të ulur tensionet mes palëve.
Trump ka këmbëngulur prej muajsh se SHBA duhet të marrë kontrollin mbi Groenlandën, territor gjysmë-autonom i Danimarkës, aleate e NATO-s. Ai ka deklaruar më herët se çdo zgjidhje tjetër përveç kalimit të ishullit nën kontrollin amerikan është “e papranueshme”.
Gjatë një aktiviteti në Shtëpinë e Bardhë lidhur me kujdesin shëndetësor në zonat rurale, Trump rikujtoi se kishte kërcënuar më parë aleatët evropianë me tarifa për produktet farmaceutike. “Mund ta bëj edhe për Groenlandën. Mund të vendos tarifa ndaj vendeve nëse nuk pajtohen për Groenlandën, sepse ne kemi nevojë për të për sigurinë kombëtare”, u shpreh ai.
Kjo është hera e parë që Trump përmend publikisht përdorimin e tarifave si mjet presioni për këtë çështje.
Ndërkohë, më herët gjatë javës, ministrat e Jashtëm të Danimarkës dhe Groenlandës janë takuar në Uashington me zëvendëspresidentin JD Vance dhe Sekretarin e Shtetit Marco Rubio. Takimi nuk arriti të zgjidhë mosmarrëveshjet, por palët ranë dakord për krijimin e një grupi pune, për qëllimin e të cilit Danimarka dhe Shtëpia e Bardhë kanë dhënë interpretime të ndryshme.
Udhëheqësit evropianë kanë theksuar se vetëm Danimarka dhe Groenlanda kanë të drejtë të vendosin për fatin e territorit. Në të njëjtën kohë, Danimarka ka njoftuar se do të rrisë praninë ushtarake në Groenlandë në bashkëpunim me aleatët.
