Shefja e Grupit Parlamentar të VV-së thekson se lufta e UÇK-së ka qenë e drejtë dhe e pastër
Shefja e Grupit Parlamentar i Levizjes Vetëvendosje, Arbërie Nagavci është distancuar nga deklarata e deputetit Fatos Geci, i cili në seancën e Kuvendit kishte uruar burgim të përjetshëm për ish-presidentin Hashim Thaçi.
Reagimi i Nagavcit erdhi pasi deklarata e Gecit nxiti reagime të ashpra në skenën politike. Ajo theksoi se qëndrimet e Grupit Parlamentar të Vetëvendosjes për luftën çlirimtare janë të njohura dhe të pandryshuara.
“Besoj janë të ditura qëndrimet e Grupit Parlamentar të Lëvizjes Vetëvendosje në lidhje me luftën çlirimtare të UÇK-së, janë publike, të qarta dhe qëndrojmë pas tyre. Lufta çlirimtare ka qenë e drejtë, e pastër dhe ne respektojmë përpjekjet e të gjithë të rënëve për liri, të gjithë atyre që kanë kontribuar për lirinë e vendit”, ka deklaruar Nagavci.
Ajo nuk komentoi drejtpërdrejt deklaratën e Gecit, por theksoi pozicionin zyrtar të partisë në raport me luftën dhe kontributin për lirinë e Kosovës.
