Ish-kryetari i Lëvizjes Vetëvendosje dhe aktualisht drejtues i Institutit “Musine Kokalari”, Visar Ymeri, ka komentuar vendimin e SHBA-së për pezullimin e Dialogut të Planifikuar Strategjik me Kosovën, duke e cilësuar atë si një lajm të keq me pasoja të mëdha për sigurinë, sundimin e ligjit dhe zhvillimin ekonomik.
“Mendoj se është një lajm i keq për Kosovën dhe se pasojat do të jenë të mëdha, veçanërisht në aspektin e sigurisë, sundimit të ligjit dhe zhvillimit ekonomik. Ky është një mesazh i qartë për qeverinë e Kosovës, veçanërisht për Kryeministrin Kurti, që duhet të ndryshojë qëndrimet e saj kur bëhet fjalë për kornizën kushtetuese të vendit dhe të drejtat e komuniteteve jo-shumicë. Ky është problemi kryesor që Kurti ka me partnerët perëndimorë, veçanërisht SHBA-në, por edhe BE-në dhe tani duket se edhe Gjermania,” ka thënë Ymeri për “Alternativa”.
Ai ka shtuar se vendimi i SHBA-së nuk pritet të ndikojë në zgjedhjet lokale, por mund të ketë efekt në ato nacionale kurdo që të mbahen.
“Nuk mendoj se kjo do të ketë ndonjë ndikim për zgjedhjet lokale, por pres që do të kemi zgjedhje të përgjithshme në fund të këtij viti ose në fillim të vitit të ardhshëm, dhe ky vendim mund të jetë një nga temat me ndikim në ato zgjedhje,” ka thënë Ymeri.
