Moderatori shqiptar thotë se sjellja politike e Kurtit është e paimagjinueshme në situatën aktuale të Kosovës dhe kërkon më shumë seriozitet institucional.
Gazetari dhe moderatori shqiptar, Çim Peka, ka reaguar lidhur me zhvillimet e fundit politike në Kosovë, duke kritikuar qasjen e kryeministrit Albin Kurti.
Sipas Pekës, sjellja e Kurtit është e paimagjinueshme për një vend që ka nevojë për stabilitet politik. Ai thekson se ndryshimet e qëndrimeve të liderit të Vetëvendosjes, sidomos në raport me çështjen e Presidentit, tregojnë mungesë serioziteti dhe dëmtojnë interesat e shtetit.
Peka ka vlerësuar se, ndonëse Kurti ka qenë i nevojshëm për Kosovën dhe ka pasur rol produktiv në një periudhë të caktuar, ai po shndërrohet çdo ditë e më shumë në problem për vendin.
Në reagimin e tij, Peka ka bërë thirrje që Kurti “të kthehet me këmbë në tokë”, duke e cilësuar si aventurier politik me prirje marksiste. Ai shton se më herët mund të justifikohej një qasje e tillë për shkak të dyshimeve mbi rolin e SHBA-së ndaj Kosovës, por sipas tij, sot kjo nuk qëndron më, pasi Uashingtoni po tregohet më dashamirës se çdo administratë tjetër.
Në fund, Peka sfidon Kurtin për debat publik, duke përmendur edhe figura të tjera politike si Vjosa Osmani, ndërsa ironizon edhe zgjedhjet e tij në raport me aleatët ndërkombëtarë.
Reagimi i Pekës vjen në një kohë tensionesh politike dhe debatesh të shumta mbi drejtimin e institucioneve në Kosovë.
