Lidhja e Historianëve të Kosovës “Ali Hadri”, dega në Decan, kanë lëshuar një komunikatë për media, ku kanë theksuar përkrahjen e tyre për Bekim Sejdiun, kandidat konsensual i VV-së dhe LDK-së për president.
Në komunikatën e tyre, Lidhja vlerëson lartë biografinë e Sejdiut.
Njoftimi i plotë:
Lidhja e Historianëve të Kosovës “Ali Hadri” dega në Deçan, shpreh mbështetjen e saj për kandidaturën e z. Bekim Sejdiu për President të Republikës së Kosovës.
Këtë mbështetje e shprehim duke u bazuar në përvojën e tij të gjatë juridike, diplomatike dhe akademike, si dhe në qëndrimet e tij të dëshmuara në mbrojtje të Kushtetutës, rendit juridik, sovranitetit dhe interesit shtetëror të Republikës së Kosovës.
Në veçanti, vlerësojmë qëndrimin e z. Bekim Sejdiu në vitin 2016, në cilësinë e gjyqtarit të Gjykatës Kushtetuese të Republikës së Kosovës, lidhur me çështjen e pronave të ndërmarrjeve “Apiko” dhe “Iliria” në Deçan, prona të cilat lidhen drejtpërdrejt me kontestin e pronësisë me Manastirin e Deçanit.
Për Lidhjen e Historianëve të Kosovës “Ali Hadri” dega në Deçan, kjo çështje ka rëndësi të veçantë historike, juridike dhe kombëtare. Ne kemi kundërshtuar dhe vazhdojmë ta kundërshtojmë aktgjykimin e Gjykatës Kushtetuese të majit 2016, përmes të cilit iu dha bazë juridike pretendimeve pronësore të Manastirit të Deçanit mbi këto prona.
Qëndrimi ynë ka qenë dhe mbetet se një vendim i tillë cenon interesin e qytetarëve të Deçanit dhe të Republikës së Kosovës dhe, sipas vlerësimit tonë, ka sjellë pasoja të rënda juridike e politike, duke hapur rrugë për zbatimin e dispozitave dhe praktikave pronësore të periudhës së regjimit të Slobodan Millosheviqit në Kosovë.
Pikërisht për këtë arsye, ne e vlerësojmë qëndrimin e z. Bekim Sejdiu në vitin 2016 si një qëndrim parimor në mbrojtje të rendit kushtetues, juridiksionit të Republikës së Kosovës dhe interesit të qytetarëve të Deçanit, në një çështje që prek drejtpërdrejt edhe pozitën e Manastirit të Deçanit dhe pretendimet e tij mbi pronat në territorin e komunës së Deçanit.
Për ne, mbrojtja e rendit juridik të Republikës së Kosovës nënkupton edhe mbrojtjen e të drejtave pronësore të qytetarëve dhe institucioneve publike të Kosovës dhe kundërshtimin e çdo përpjekjeje që, sipas vlerësimit tonë, synon të rikthejë pasoja juridike të politikave të regjimit të Millosheviqit.
Lidhja e Historianëve të Kosovës “Ali Hadri” dega në Deçan, vlerëson lart edhe përvojën diplomatike të z. Bekim Sejdiu dhe kontributin e tij në përfaqësimin dhe afirmimin e Republikës së Kosovës në arenën ndërkombëtare.
Veçanërisht çmojmë angazhimin e tij diplomatik në Turqi dhe në Shtetet e Bashkuara të Amerikës, ku ka kontribuar me përvojën dhe njohuritë e tij në fushën e marrëdhënieve ndërkombëtare dhe në forcimin e marrëdhënieve të Kosovës me partnerët e saj ndërkombëtarë.
Një vlerë të veçantë përbën edhe kontributi i tij shumëvjeçar akademik si profesor në Universitetin e Prishtinës. Përmes punës së tij universitare, ligjërimit dhe edukimit të brezave të rinj, z. Sejdiu ka dhënë kontribut në zhvillimin e arsimit të lartë dhe të kuadrove profesionale të Republikës së Kosovës.
Përvoja e tij si gjyqtar i Gjykatës Kushtetuese, diplomat dhe profesor universitar, përbën një kombinim të rëndësishëm të përvojës juridike, institucionale, diplomatike dhe akademike. Këto përvoja, sipas vlerësimit tonë, përbëjnë një bazë të rëndësishme për ushtrimin me përgjegjësi të detyrës së Presidentit të Republikës së Kosovës.
Në këtë kuadër, Lidhja e Historianëve të Kosovës “Ali Hadri” dega në Deçan, vlerëson edhe kontributin e familjes Sejdiu në rrugën historike të popullit të Kosovës për liri, çlirim dhe pavarësi.
Sakrifica, angazhimi dhe kontributi i familjeve shqiptare që kanë qenë pjesë e kësaj rruge të vështirë historike janë pjesë e kujtesës sonë kombëtare dhe duhet të ruhen e të nderohen.
Ne besojmë se në krye të institucioneve të Republikës së Kosovës duhet të jenë personalitete që kanë dëshmuar integritet profesional, përkushtim shtetëror, respekt për Kushtetutën dhe gatishmëri për të mbrojtur interesin e Republikës së Kosovës.
Prandaj, duke marrë parasysh përvojën e tij si gjyqtar i Gjykatës Kushtetuese, përvojën diplomatike në Turqi dhe Shtetet e Bashkuara të Amerikës, kontributin shumëvjeçar si profesor në Universitetin e Prishtinës, qëndrimet e tij në mbrojtje të rendit kushtetues dhe juridiksionit të Republikës së Kosovës, si dhe kontributin e familjes së tij në rrugën e lirisë, Lidhja e Historianëve të Kosovës “Ali Hadri” dega në Deçan, shpreh mbështetjen e saj për kandidaturën e z. Bekim Sejdiu për President të Republikës së Kosovës.
Këtë mbështetje e konsiderojmë si mbështetje për një figurë me përvojë juridike, diplomatike dhe akademike, e cila, sipas vlerësimit tonë, mund të kontribuojë në forcimin e shtetit të së drejtës, Kushtetutës, sovranitetit, integritetit territorial dhe subjektivitetit ndërkombëtar të Republikës së Kosovës.
Kryesia e Lidhjes së Historianëve të Kosovës “Ali Hadri” dega në Deçan
